న్యూజిలాండ్ లో 16 ఏళ్ల లోపు పిల్లలు సోషల్ మీడియా వాడటాన్ని నిషేధిస్తూ ప్రభుత్వం ఆన్లైన్ సేఫ్టీ బిల్లు ప్రవేశపెట్టింది. ఈ బిల్లు ప్రకారం ఇన్స్టాగ్రామ్, టిక్టాక్, స్నాప్చాట్, ఫేస్బుక్ వంటి ప్రధాన సోషల్ మీడియా సంస్థలు 16 ఏళ్ల లోపు వినియోగదారులు ఖాతాలు తెరవకుండా అడ్డుకోవాల్సి ఉంటుంది. నిబంధనలు పాటించడంలో విఫలమయ్యే సోషల్ మీడియా సంస్థలకు వాటి ప్రపంచవ్యాప్త రాబడిలో 10% వరకు జరిమానా విధించే నిబంధనలను రూపొందించారు. వినియోగదారుల వయస్సును నిర్ధారించడానికి డిజిటల్ ఐడీ సర్వీసులు, ఫేషియల్ ఏజ్ ఎస్టిమేషన్ (ముఖ గుర్తింపు ఆధారిత వయస్సు నిర్ధారణ), అధికారిక ఐడీ గుర్తింపు కార్డులు లేదా పాత ఖాతాల వివరాలను టెక్ సంస్థలు ఉపయోగించాల్సి ఉంటుంది. వాట్సాప్ వంటి మెసేజింగ్ యాప్లు, రోబ్లాక్స్ వంటి మల్టీప్లేయర్ ఆన్లైన్ గేమ్లు, చాట్జీపీటీ వంటి ఉత్పాదక ఆధారిత AI యాప్లకు ఈ నిషేధం నుంచి మినహాయింపు ఉంటుంది. ఈ చట్టం వల్ల విధించే జరిమానాలు కేవలం టెక్ కంపెనీలపై మాత్రమే ఉంటాయి తప్ప, పిల్లలు లేదా వారి తల్లిదండ్రులపై ఎలాంటి చట్టపరమైన చర్యలు ఉండవు. న్యూజిలాండ్ ప్రధాని క్రిస్టోఫర్ లక్సన్ నేతృత్వంలోని నేషనల్ పార్టీకి కూటమి భాగస్వాములైన 'యాక్ట్' మరియు 'న్యూజిలాండ్ ఫస్ట్' పార్టీల మద్దతు లేదు. ఆస్ట్రేలియాలో ఇలాంటి చట్టం తెచ్చినా ఆశించిన స్థాయిలో పలితాలు ఇవ్వలేదని, వీపీఎన్ల ద్వారా పిల్లలు సులువుగా ఈ పరిమితులను దాటుతున్నారని భాగస్వామ్య పార్టీల నేతలు అభిప్రాయపడ్డారు. ప్రపంచవ్యాప్తంగా ఇప్పటికే ఆస్ట్రేలియా 16 ఏళ్ల లోపు వారికి సోషల్ మీడియాను నిషేధించగా, ఆ బాటలోనే యూకే, ఫ్రాన్స్, ఇండోనేషియా, బ్రెజిల్ వంటి అనేక దేశాలు ఇలాంటి కఠిన ఆంక్షల దిశగా అడుగులు వేస్తున్నాయి. ఈ బిల్లు ఆమోదం పొందాలంటే ప్రతిపక్షాలైన లేబర్, గ్రీన్స్ వంటి ఇతర పార్టీల మద్దతు అవసరం కానుంది. న్యూజిలాండ్ ఎన్నికల నిర్వహణ, ఓటింగ్ ప్రక్రియ మరియు అధికారిక ప్రకటనలకు సంబంధించిన అధికారిక మార్గదర్శకాలు తెలుసుకోవడానికి Vote NZ Official Website ను పరిశీలించవచ్చు.
0 Comments