అంతర్జాతీయ మార్కెట్లో 'యార్సాగుంబా' అని పిలిచే హిమాలయ ప్రాంతంలో లభించే 'క్యాటర్పిల్లర్ ఫంగస్'కి విపరీతమైన డిమాండ్ వుంది. ప్రపంచ మార్కెట్లో దీని ధర కిలోకు సుమారు రూ. 20 లక్షల వరకు పలుకుతుండటంతో ఇది అందరి దృష్టిని ఆకర్షిస్తోంది. హిమాలయాల్లోని 4,000 మీటర్ల కంటే ఎక్కువ ఎత్తున్న మంచు ప్రదేశాలలో నివసించే ఒక రకమైన చిమ్మట యొక్క లార్వాలు (క్యాటర్పిల్లర్స్) భూమి అడుగున ఉన్న సమయంలో ఒక రకమైన శిలీంధ్రం (ఫంగస్) వాటి శరీరంలోకి ప్రవేశిస్తుంది. ఆ ఫంగస్ సదరు పురుగులోని జీవసారాన్ని మొత్తం పీల్చేసి, దాన్ని లోపలనే చంపేస్తుంది. ఆ తర్వాత వేసవి కాలంలో మంచు కరగడం ప్రారంభమయ్యాక, చనిపోయిన ఆ పురుగు తల భాగం నుండి ఒక చిన్న గడ్డి మొలక లాంటి ఫంగస్ భూమిపైకి వస్తుంది. తవ్వి తీస్తే కింద పురుగు, పైన ఫంగస్ కలిసిపోయి ఒకే ఆకారంలో కనిపిస్తాయి. ఈ అరుదైన జీవినే 'యార్సాగుంబా' అని పిలుస్తారు. చైనా సాంప్రదాయ వైద్యంలో ఈ జీవికి అత్యంత ప్రాధాన్యత ఉంది. దీనికి అనేక రకాల అద్భుత వైద్య గుణాలు ఉన్నాయని నమ్ముతారు. ఇది శరీరానికి అమితమైన శక్తిని, రోగనిరోధక శక్తిని అందిస్తుంది. అంతర్జాతీయంగా దీనిని 'హిమాలయన్ వయాగ్రా' అనే పేరుతో కూడా పిలుస్తారు. అంతేకాకుండా, ఇది క్యాన్సర్ కణాలకు వ్యతిరేకంగా పోరాడుతుందని, మూత్రపిండాలు మరియు ఊపిరితిత్తులు సంబంధిత సమస్యల నివారణకు అద్భుతంగా సహాయపడుతుందని పరిశోధనలు చెబుతున్నాయి. ఈ కారణాల వల్లనే అంతర్జాతీయ మార్కెట్లో ఈ క్యాటర్పిల్లర్ ఫంగస్కు ఏటా డిమాండ్ భారీగా పెరుగుతోంది. ప్రతి ఏటా మే, జూన్ నెలల్లో నేపాల్లోని డోల్పా, రుకుమ్ వంటి పర్వత ప్రాంత గ్రామాల్లో పాఠశాలలు, ఇళ్లు తాత్కాలికంగా మూతపడతాయి. చిన్న పిల్లల నుండి ముసలివారి వరకు దాదాపు అందరూ మంచుతో నిండిన ప్రమాదకరమైన పర్వత ప్రాంతాలకు వెళ్లి భూమిలో దాగున్న యార్సాగుంబాను వెతికే పనిలో పడతారు. అక్కడి తీవ్రమైన చలి, ఆక్సిజన్ కొరత, మంచు చరియలు విరిగిపడే ప్రమాదాలు ఉన్నప్పటికీ పేదరికంలో మగ్గుతున్న ఎన్నో కుటుంబాలకు ఇదే ప్రధాన ఆదాయ వనరుగా మారింది. భూమి లోపల చనిపోయే ఒక చిన్న పురుగు.. అంతర్జాతీయ మార్కెట్లో కోట్ల రూపాయల విలువైన ఆర్థిక వనరుగా మారడం ప్రకృతి ప్రసాదించిన వింతల్లో ఒకటిగా భావించవచ్చు.
0 Comments