కర్నూలు జిల్లాలో ఘోర బస్సు ప్రమాదం : 20 మంది సజీవ దహనం

హైదరాబాద్ నుంచి బెంగళూరుకు వెళ్తున్న వేమూరి కావేరి ట్రావెల్స్ బస్సు తెల్లవారు జామున 3.30 గంటల సమయంలో కర్నూల్ జిల్లా కల్లూరు మండలం చిన్నటేకూరు ఉల్లిందకొండ క్రాస్ వద్దకు చేరుకోగానే ఓ బైక్ ను ఢీకొట్టడంతో బస్సులో మంటలు చెలరేగాయి. క్షణాల్లో మంటలు బస్సును వ్యాపించడంతో 20 మంది వరకు సజీవ దహనమైయ్యారు. పలువురు బస్సు నుంచి బయటకు దూకి ప్రణాలతో బయటపడ్డారు. ఈ ప్రమాదం సమయంలో బస్సులో మొత్తం 42 మంది ఉన్నట్లు తెలుస్తుంది.  ప్రమాదం విషయాన్ని తెలుసుకున్న పోలీసులు ఘటన స్థలికి చేరుకొని క్షతగాత్రులను చికిత్స నిమిత్తం కర్నూలు ప్రభుత్వ ఆస్పత్రికి తరలించారు. ఘటన స్థలిని ఎస్పీ విక్రాంత్ పాటిల్ చేరుకొని వివరాలు వెల్లడించారు. బస్సులో మంటలు రాడంతో డ్రైవర్ మరో డ్రైవర్‌ను నిద్రలేపాడు. చిన్న ప్రమాదమని భావించి మంటలు ఆర్పేసే ప్రయత్నం చేశారు. మంటలు ఎక్కువ అయ్యే సరికి ప్రయాణికులను అలర్ట్ చేశారు. దీంతో ఎమర్జెన్సీ డోర్లు బద్దలు కొట్టి కొంత మంది ప్రయాణికులు బయటపడ్డారు. ఎంత మంది చనిపోయారన్న దానిపై ఇప్పుడే చెప్పలేం. క్షతగాత్రులు కర్నూల్ జీజీహెచ్‌లో చికిత్స పొందుతున్నారు. ఇద్దరు డ్రైవర్లను అదుపులోకి తీసుకున్నాం. ప్రమాదంపై ఇద్దరు డ్రైవర్లను ప్రశ్నిస్తున్నామని ఎస్పీ తెలిపారు. అగ్నిప్రమాదానికి గురైన ట్రావెల్స్ బస్సు మొదటి డ్రైవర్ మిరియాల లక్ష్మయ్య, రెండో డ్రైవర్ గండిపాటి శివన్నారాయణని పోలీసులు అదుపులోకి తీసుకొని విచారణ చేస్తున్నారు. ప్రమాదం నుంచి బయటపడిన వారిలో జయసూర్య, రామిరెడ్డి, అకీరా, వేణుగోపాల్ రెడ్డి, హారిక, సత్యనారాయణ, శ్రీలక్ష్మీ, నవీన్ కుమార్, అఖిల్, జస్మత, రమేష్, సుబ్రహ్మణ్యం తదితరులు ఉన్నారు. బస్సులో మొత్తం 40మందికిపైగా ప్రయాణికులు ఉన్నట్లు తెలుస్తుండగా ఆస్పత్రిలో 20 మంది చికిత్స పొందుతున్నారని అధికారులు తెలిపారు. ప్రమాద స్థలాన్ని కలెక్టర్ సిరి పరిశీలించారు. ఈ సందర్భంగా మాట్లాడుతూ.. బైక్ బస్సు కిందకు వెళ్లడంతో ప్రమాదం సంభవించింది. డోర్ ఓపెన్ అయ్యే కేబుల్ తెగిపోయింది. 20 మంది ప్రయాణికులు మిస్ అయ్యారు. ఇప్పటి వరకు 11 మృతదేహాలను వెలికితీశాం. 20 మంది క్షేమంగా బయటపడ్డారని కలెక్టర్ తెలిపారు.