ప్రధాన ఎన్నికల కమిషనర్ జ్ఞానేశ్ కుమార్‌ను సస్పెండ్ చేయాలని కోరుతూ దాఖలైన పిటిషన్లపై స్పందించేందుకు పిటిషనర్లకు సుప్రీంకోర్టు 10 రోజుల గడువు ఇచ్చింది. ఓటర్ల జాబితాల ప్రత్యేక సమగ్ర సవరణ ప్రక్రియలో అవకతవకలు జరిగాయన్న ఆరోపణల నేపథ్యంలో దాఖలైన పిటిషన్లపై భారత ఎన్నికల సంఘానికి కూడా నోటీసులు జారీ చేసింది. ఓటు చోరీ ఆరోపణల మధ్య దేశవ్యాప్తంగా నిర్వహిస్తున్న ఓటర్ల జాబితాల ప్రత్యేక సమగ్ర సవరణ ప్రక్రియను సమర్థిస్తూ ఎన్నికల సంఘం దాఖలు చేసిన అఫిడవిట్‌పై పిటిషనర్లు తమ సమాధానాలు ఇవ్వాలని మంగళవారం ఆదేశించింది. భారత ప్రధాన న్యాయమూర్తి జస్టిస్ సూర్యకాంత్, జస్టిస్ జాయ్‌మాల్య బాగ్చీ, జస్టిస్ వి. మోహనలతో కూడిన ముగ్గురు సభ్యుల ధర్మాసనం ఈ వ్యవహారంపై తదుపరి విచారణను వాయిదా వేసింది. నవంబర్ 17న కేసును విచారణకు జాబితా చేసే అవకాశం ఉంది. లోక్‌సభలో ప్రతిపక్ష నేత రాహుల్ గాంధీతో పాటు ఇండియా కూటమి నేతలు దాఖలు చేసిన పిటిషన్లు సహా, జ్ఞానేశ్ కుమార్‌ను సస్పెండ్ చేయాలని కోరిన అన్ని పిటిషన్లపై ఎన్నికల సంఘానికి నోటీసులు జారీ చేసింది. దేశవ్యాప్తంగా చేపట్టిన SIR ప్రక్రియను సమర్థిస్తూ ఎన్నికల సంఘం ఒక రోజు ముందే సుప్రీంకోర్టులో అఫిడవిట్ దాఖలు చేసింది. కమిషన్‌లోని ముగ్గురు సభ్యులూ ఏకగ్రీవంగానే నిర్ణయాలు తీసుకున్నారని స్పష్టం చేసింది. ఓటర్ల నమోదుకు ఉపయోగించే ఫారం-6లో మార్పులు చేశారన్న ఆరోపణలను కూడా తోసిపుచ్చింది. 248 పేజీల కౌంటర్ అఫిడవిట్‌లో పిటిషనర్ల ఆరోపణలు అపోహలతో కూడుకున్నవని ఎన్నికల సంఘం పేర్కొంది. ఈ పిటిషన్లను ప్రాథమిక దశలోనే కొట్టివేయాలని సుప్రీంకోర్టును కోరింది. 2025 జూన్ 24, 2025 అక్టోబర్ 27, 2026 మే 14 తేదీల్లో జారీ చేసిన SIR ఆదేశాలన్నీ ఏకగ్రీవంగా తీసుకున్నవేనని ఎన్నికల సంఘం తన అఫిడవిట్‌లో పేర్కొంది. భారత రాజ్యాంగంలోని ఆర్టికల్ 324, 2023 నాటి ప్రధాన ఎన్నికల కమిషనర్, ఇతర ఎన్నికల కమిషనర్ల (నియామకం, సేవా నిబంధనలు, పదవీకాలం) చట్టంలోని సెక్షన్ 18 ప్రకారం ఈ నిర్ణయాలు తీసుకున్నట్లు వివరించింది.
