వారం రోజుల వ్యవధిలోనే రూ.10,700 కి పైగా క్షీణించిన బంగారం ధర : వరుసగా ఐదో రోజూ కూడా పతనం

రికార్డు స్థాయిలో ఆకాశాన్నంటిన పసిడి ధరలు ఇప్పుడు కిందికి దిగివస్తున్నాయి. ఎంసీఎక్స్ మార్కెట్‌లో వరుసగా ఐదో రోజూ పసిడి పతనం కొనసాగింది. కేవలం వారం రోజుల వ్యవధిలోనే 10 గ్రాముల బంగారం ధర ఏకంగా రూ.10,700 కి పైగా క్షీణించి మార్కెట్ వర్గాలను ఆశ్చర్యానికి గురిచేసింది. ఆగస్టు 24న 10 గ్రాముల బంగారం రికార్డు స్థాయిలో రూ.1,63,229 దాటగా, సెప్టెంబర్ 1 నాటికి అది రూ.1,52,514 వద్దకు పడిపోయింది. ఒక్క రోజులోనే దాదాపు రూ.1,900 వరకు పతనం కావడం గమనార్హం. గత కొంతకాలంగా ఊహించని రీతిలో పెరిగిన పసిడి ధరలతో విసిగిపోయిన ఇన్వెస్టర్లు ఒక్కసారిగా ప్రాఫిట్ బుకింగ్‌కు దిగడం ఈ పతనానికి ప్రధాన కారణమైంది. దీనికి తోడు అమెరికా సెంట్రల్ బ్యాంక్ 'ఫెడరల్ రిజర్వ్' వడ్డీ రేట్లను పెంచవచ్చనే సంకేతాలు పసిడిపై ఒత్తిడి పెంచాయి. అమెరికా డాలర్ విలువ పుంజుకోవడం, బాండ్ ఈల్డ్స్ పెరగడం వల్ల అంతర్జాతీయ మార్కెట్‌లో కామెక్స్ గోల్డ్ ధర కూడా ఔన్స్‌కు $4,734 నుంచి ఒక్కసారిగా $4,370 సమీపానికి పడిపోయింది. యూఎస్-ఇరాన్ ఉద్రిక్తతల వల్ల చమురు ధరలు పెరగడం, ద్రవ్యోల్బణ భయాలు కూడా బంగారంపై ప్రభావం చూపాయి. అంతర్జాతీయ పరిణామాలతో పాటు మన దేశంలోనూ పసిడి సెంటిమెంట్‌ను దెబ్బతీసే మరో కీలక పరిణామం చోటుచేసుకుంది. అత్యవసరమైతే తప్ప అనవసరంగా గోల్డ్ కొనుగోలు చేయవద్దంటూ ప్రధాని నరేంద్ర మోదీ పౌరులకు చేసిన విజ్ఞప్తి స్వదేశీ బులియన్ మార్కెట్‌లో కొత్త చర్చకు దారితీసింది. ఈ ప్రకటన అంతర్జాతీయ మార్కెట్‌ను నేరుగా ప్రభావితం చేయకపోయినా, రాబోయే పండుగల సీజన్‌లో భారత్‌లో ఆభరణాల డిమాండ్‌పై కొంత ప్రభావం చూపే అవకాశం ఉందని ఆర్థిక విశ్లేషకులు భావిస్తున్నారు. ఆగస్టు నెలలో బంగారం 9.4 శాతం, వెండి 15 శాతం వరకు లాభాలను అందించి రికార్డు సృష్టించినప్పటికీ, నెల చివరి నాటికి మార్కెట్ తలకిందులైంది. అయితే ఈ పతనం ఇక్కడితో ఆగుతుందా లేదా అనేది ఈ వారంలో వెలువడనున్న అమెరికా ఉపాధి (నాల్‌ఫార్మ్ పేరోల్స్), నిరుద్యోగిత గణాంకాలపైనే ఆధారపడి ఉంటుంది. ఒకవేళ అమెరికా ఉపాధి డేటా బలంగా వస్తే డాలర్ మరింత పుంజుకుని పసిడి ధరలు మరికొంత తగ్గే అవకాశం ఉందని, డేటా బలహీనంగా ఉంటే మార్కెట్ మళ్లీ కోలుకునే అవకాశం ఉందని నిపుణులు అంచనా వేస్తున్నారు.