ఐటీ, కార్పొరేట్ ఉద్యోగుల కోసం 'లేట్ నైట్ ఈట్స్' ప్రారంభించిన స్విగ్గీ

రాత్రి వేళల్లో ఆలస్యంగా మరియు విదేశీ టైమ్ జోన్‌లలో పనిచేసే ఉద్యోగుల కోసం స్విగ్గీ లిమిటెడ్ సరికొత్త 'లేట్ నైట్ ఈట్స్'  సేవలను జూలైలో అధికారికంగా ప్రారంభించింది. దేశంలోని టాప్ 30 నగరాల్లోని 4,000కు పైగా ఆఫీస్ లొకేషన్లు, 30,000కు పైగా రెస్టారెంట్లలో రాత్రి 10 గంటల నుండి ఉదయం 5 గంటల మధ్య ఈ సేవలు అందుబాటులో ఉంటాయి. ఇందులో భాగంగా, బర్గర్ కింగ్, డొమినోస్, మెక్‌డొనాల్డ్స్, కేఎఫ్‌సీ వంటి ప్రముఖ బ్రాండ్ల నుండి భారీ డిస్కౌంట్లు, వేగవంతమైన డెలివరీతో ఆహారాన్ని సులభంగా పొందవచ్చు. ముఖ్యంగా కార్యాలయాల్లో డెస్క్ వద్ద కూర్చుని తినేందుకు వీలుగా ‘డెస్క్‌ఈట్స్’ కింద వన్-హ్యాండెడ్ గ్రాబీస్ (రోల్స్, ర్యాప్స్), గ్రెయిన్ బౌల్స్ వంటి హెల్తీ నిబుల్స్, కాఫీ, టీలతో కూడిన సిప్-టాస్టిక్ ఫ్యూయల్, మరియు గ్రూప్ ఆర్డర్ల కోసం టీమ్‌వర్క్ బైట్స్ (పిజ్జాలు) వంటి రకాలను ప్రత్యేకంగా ఎంపిక చేశారు. దీనితో పాటు కనీసం రాత్రి 2 గంటల వరకు నిరంతరాయంగా సేవలు అందించేలా “2 AM క్లబ్”ను కూడా స్విగ్గీ యాప్ లో ప్రవేశపెట్టింది. స్విగ్గీ అంతర్గత డేటా ప్రకారం, ప్రధాన ఆఫీస్ ప్రాంతాల్లోని దాదాపు 25 శాతం మంది కార్పొరేట్ ఉద్యోగులు రాత్రి 10 గంటల తర్వాత ఫుడ్ ఆర్డర్ చేస్తున్నారు. అయితే, ఈ ట్రెండ్ కేవలం మెట్రో నగరాలకే పరిమితం కాకుండా భువనేశ్వర్, గోవా, కొచ్చి, లక్నో, విశాఖపట్నం (వైజాగ్) మరియు అహ్మదాబాద్ వంటి టైర్-2 (ద్వితీయ శ్రేణి) నగరాల్లో రెండంకెల వృద్ధిని సాధిస్తూ దూసుకుపోతుండటం విశేషం. ఆఫీస్ ప్రాంతాలకు సేవలు అందిస్తున్న రెస్టారెంట్లలో మూడింట ఒక వంతు కంటే ఎక్కువ రెస్టారెంట్లు రాత్రి 10 నుండి ఉదయం 6 గంటల వరకు ఆర్డర్లను స్వీకరిస్తున్నాయి. ఈ సందర్భంగా స్విగ్గీ వైస్ ప్రెసిడెంట్ దీపక్ మాలూ మాట్లాడుతూ, నేటి ఆధునిక నిపుణులు గ్లోబల్ షెడ్యూల్‌లతో ఎక్కువ గంటలు పని చేస్తున్నారని, వారి మారుతున్న జీవనశైలికి అనుగుణంగా ఆహారాన్ని మరింత అందుబాటులోకి, తక్కువ ధరలో మరియు సందర్భోచితంగా మార్చేందుకే ‘లేట్ నైట్ ఈట్స్’ను తీసుకువచ్చినట్లు తెలిపారు.