రైలు పట్టాలు దాటుతున్న ప్రయాణికులను బలంగా ఢీకొన్న షాలిమార్ ఎక్స్‌ప్రెస్ : నలుగురు దుర్మరణం

ఆంధ్రప్రదేశ్‌లోని ఏలూరు జిల్లా, ఉంగుటూరు మండలం, చేబ్రోలు రైల్వేస్టేషన్ సమీపంలో వేగంగా దూసుకొచ్చిన షాలిమార్ ఎక్స్‌ప్రెస్ రైలు పట్టాలు దాటుతున్న ప్రయాణికులను బలంగా ఢీకొట్టింది. ఈ ఘోర ప్రమాదంలో నలుగురు ప్రయాణికులు అక్కడికక్కడే శరీరాలు ఛిన్నభిన్నమై అత్యంత దారుణంగా మరణించారు. మృతుల్లో ముగ్గురు మహిళలు, ఒక యువకుడు ఉన్నట్లు తెలుస్తుంది. రైల్వే పోలీసుల ప్రాథమిక విచారణ ప్రకారం ప్రమాదానికి గురైన బాధితులు చేబ్రోలు రైల్వేస్టేషన్ సమీపంలో అజాగ్రత్తగా ట్రాక్ దాటేందుకు ప్రయత్నించినట్లు తెలుస్తోంది. అదే సమయంలో ఒడిశా/పశ్చిమ బెంగాల్ వైపు వెళ్తున్న షాలిమార్ రైలు ఒక్కసారిగా దూసుకురావడంతో, వారు రైలును గమనించేలోపే ఈ ఘోర ప్రమాదం జరిగిపోయింది. ఘటనా స్థలానికి చేరిన పోలీసులు: ప్రమాదం జరిగిన వెంటనే స్థానికులు రైల్వే అధికారులకు, పోలీసులకు సమాచారం అందించారు. దీంతో ఏలూరు రైల్వే పోలీసులు, స్థానిక లా అండ్ ఆర్డర్ పోలీసులు తక్షణమే ఘటనా స్థలానికి చేరుకుని సహాయక చర్యలు చేపట్టారు. పోలీసులు మృతదేహాలను పోస్ట్‌మార్టం నిమిత్తం స్థానిక ప్రభుత్వ ఆసుపత్రికి తరలించి, కేసు నమోదు చేసుకుని దర్యాప్తు చేస్తున్నారు.