డేటింగ్ యాప్ ద్వారా ₹52 లక్షలు మోసపోయిన మహిళా న్యాయమూర్తి : జడ్జి పరోక్షంగా ఫిర్యాదు చేయడంపై కోర్టు తీవ్ర అసంతృప్తి

హర్యానాకు చెందిన ఒక మహిళా న్యాయమూర్తి డేటింగ్ యాప్ 'టిండర్'ద్వారా పరిచయమైన ఒక కేటుగాడి చేతిలో ₹52 లక్షల రూపాయల వరకు మోసపోయింది. గత ఏడాది నవంబర్‌లో, తనను ఒక రహస్య ప్రభుత్వ విభాగానికి చెందిన ఉన్నతాధికారిగా పరిచయం చేసుకున్న అభిమన్యు వశిష్ట్ అనే వ్యక్తితో ఈ మహిళా జడ్జికి 'టిండర్' యాప్ ద్వారా పరిచయం ఏర్పడింది. ఆ పరిచయం కాస్తా నాటకీయంగా ప్రేమగా మారింది. ఇదే అదనుగా భావించిన ఆ కేటుగాడు, భారీ లాభాలు వచ్చే పెట్టుబడి పథకాలు (ఇన్వెస్ట్‌మెంట్ ప్లాన్స్) ఉన్నాయంటూ నమ్మించి, ఆ మహిళా న్యాయమూర్తి నుండి విడతల వారీగా ₹52 లక్షలకు పైగా డబ్బు వసూలు చేశాడు. అయితే, చెప్పినట్లుగా ఎలాంటి లాభాలు రాకపోవడంతో పాటు, అసలు డబ్బు కూడా తిరిగి ఇవ్వకపోవడంతో తాను మోసపోయానని గ్రహించిన సదరు జడ్జి.. ఇది ఒక పక్కా ప్లాన్ ప్రకారం జరిగిన 'హనీట్రాప్' మోసమని ఆలస్యంగా గుర్తించారు. ఈ కేసులో అత్యంత ఆసక్తికరమైన మరియు వివాదాస్పదమైన మలుపు ఏమిటంటే బాధితురాలు స్వయంగా ఒక న్యాయమూర్తి కావడంతో, తన పదవి, సామాజిక హోదా మరియు సమాజంలో వచ్చే అవమానానికి భయపడి ఆమె నేరుగా పోలీసులకు ఫిర్యాదు చేయలేదు. దానికి బదులుగా, తన ఇంట్లో పనిచేసే పనిమనిషి పేరుతో పోలీసులకు ఫిర్యాదు చేయించారు. ఈ కేసు విచారణ సందర్భంగా ఢిల్లీ న్యాయస్థానం నిందితుడికి బెయిల్ ఇవ్వడానికి నిరాకరించింది. అదే సమయంలో, అసలైన బాధితురాలైన మహిళా జడ్జి పరోక్షంగా  ఫిర్యాదు చేయడంపై కోర్టు తీవ్ర అసంతృప్తి వ్యక్తం చేసింది. ఇలాంటి ప్రేమ మోసాల్లో అవమానం, సంకోచం కలగడం సహజమే అయినప్పటికీ, అది చట్టపరమైన నిష్పాక్షిక విచారణకు అడ్డంకిగా మారకూడదని కోర్టు స్పష్టం చేసింది. ఈ కేసులో వాట్సాప్ మరియు టిండర్ చాటింగ్ వివరాలను పూర్తిగా సేకరించి, దర్యాప్తును వేగవంతం చేయాలని పోలీసులను కోర్టు ఆదేశించింది.