మైనర్ బాలికలపై లైంగిక దాడి : నిందితుడిని పట్టించిన స్నేహితుడు

కేరళలోని కాసర్‌గోడ్ లో మౌగరల్ మలయన్ వీధికి చెందిన అబ్దుల్ రజాక్ (38) అనే వ్యక్తి పెరుంబావూర్‌లో భవన నిర్మాణ కార్మికుడిగా పనిచేస్తూ, డ్రైవింగ్, ఇతర పనుల కోసం తన స్నేహితులతో కలిసి ఒక అద్దె ఇంట్లో నివసిస్తున్నాడు. అతని ఇంటికి ఆనుకుని ఉన్న మరో పోర్షన్‌లో ఒక వలస కార్మిక కుటుంబం ఉంటోంది. ఆ కుటుంబానికి పన్నెండు మరియు తొమ్మిది ఏళ్ల వయసున్న ఇద్దరు కుమార్తెలు ఉన్నారు. పిల్లల తల్లిదండ్రులు ఉదయాన్నే పనుల కోసం బయటకు వెళ్లగానే, ఒంటరిగా ఉన్న బాలికలపై కన్నేసి గత కొన్ని నెలలుగా వారిపై లైంగిక దాడికి పాల్పడుతున్నాడు. అంతటితో ఆగకుండా, ఆ పైశాచిక కృత్యాలను తన మొబైల్ ఫోన్‌లో వీడియో తీసి వారిని భయపెట్టేవాడని విచారణలో తేలిందని పోలీసుల తెలిపారు. నిందితుడి ప్రవర్తనలో మార్పును గమనించిన అతని స్నేహితుడికి అనుమానం కలిగింది. రజాక్ మొబైల్ ఫోన్ లేదా అతని కదలికల ద్వారా ఏదో తప్పు జరుగుతోందని పసిగట్టిన సదరు స్నేహితుడు, వెంటనే చైల్డ్ వెల్ఫేర్ కమిటీకి సమాచారాన్ని అందించాడు. రంగంలోకి దిగిన సీడబ్ల్యూసీ ప్రతినిధులు బాలికలతో మాట్లాడగా, నిందితుడు తమపై చేస్తున్న అరాచకాలను వారు కన్నీళ్లతో వివరించారు. పిల్లల వాంగ్మూలం ఆధారంగా కేసు నమోదు చేశామని, నిందితుడు చాలా కాలంగా ఈ ఘాతుకానికి పాల్పడుతున్నట్లు తెలుస్తోంది. ప్రస్తుతం అతడిని రిమాండ్‌కు తరలించామని తనిఖీ అధికారులు వెల్లడించారు. సీడబ్ల్యూసీ నివేదిక ఆధారంగా ఇన్స్‌పెక్టర్ ఎల్. అనిల్ కుమార్ నేతృత్వంలో ఎస్సై ప్రవీణ్ ప్రకాష్, ఏఎస్సైలు రతీశన్, సుబైర్ మరియు ఇతర సిబ్బందితో కూడిన బృందం నిందితుడిని అరెస్ట్ చేసింది. మొబైల్ ఫోన్‌ను స్వాధీనం చేసుకున్న పోలీసులు, అందులోని వీడియో ఆధారాలను సేకరించే పనిలో ఉన్నారు. నిందితుడిని కోర్టులో హాజరుపరచగా, న్యాయస్థానం అతడికి రిమాండ్ విధించింది.