భారత గూఢచారి సంస్థ, రాష్ట్రీయ స్వయంసేవక్ సంఘ్ లపై ఆంక్షలు విధించాలి : అమెరికా ప్రభుత్వ కమిషన్

భారతదేశంలో మత స్వేచ్ఛ ఉల్లంఘనలు జరుగుతున్నాయని పేర్కొంటూ, భారత్‌ను "ప్రత్యేక ఆందోళన కలిగించే దేశం"గా ప్రకటించాలని అమెరికా ప్రభుత్వ కమిషన్ సిఫార్సు చేసింది. అంతేకాకుండా, భారత గూఢచారి సంస్థ, రాష్ట్రీయ స్వయంసేవక్ సంఘ్ లపై ఆంక్షలు విధించాలని కోరడంపై కేంద్ర ప్రభుత్వం సోమవారం తీవ్రంగా స్పందించింది. విదేశీ వ్యవహారాల మంత్రిత్వ శాఖ ప్రతినిధి రణధీర్ జైస్వాల్ ఈ నివేదికను ఖండిస్తూ  "అమెరికా అంతర్జాతీయ మత స్వేచ్ఛ కమిషన్ నివేదికను మేము గమనించాము. భారత్‌పై వారు చేసిన ప్రేరేపిత మరియు పక్షపాతపూరిత వ్యాఖ్యలను మేము పూర్తిగా తిరస్కరిస్తున్నాము. గత కొన్నేళ్లుగా అమెరికా ప్రభుత్వ కమిషన్ వాస్తవాలను పక్కన పెట్టి, తప్పుడు ఆధారాలు మరియు సైద్ధాంతిక కథనాల ఆధారంగా భారత్‌ను తప్పుగా చూపిస్తోంది." అని అన్నారు: "ఇలాంటి పదే పదే చేసే తప్పుడు ఆరోపణలు ఆ కమిషన్ విశ్వసనీయతనే దెబ్బతీస్తాయి. భారత్‌ను ఎంపిక చేసుకుని విమర్శించే బదులు అమెరికాలో హిందూ దేవాలయాలపై జరుగుతున్న దాడులు, అక్కడ పెరుగుతున్న అసహనం మరియు భారతీయ డయాస్పోరాపై జరుగుతున్న వేధింపుల గురించి ఆ కమిషన్ దృష్టి పెడితే బాగుంటుంది" అని ఆయన అన్నారు. భారత్‌లో మత స్వేచ్ఛ క్షీణించిందని, దీనికి బాధ్యులైన వ్యక్తులు మరియు సంస్థలపై ఆంక్షలు విధించాలని, వారి ఆస్తులను స్తంభింపజేసి అమెరికాలోకి రాకుండా నిషేధించాలని ప్రతిపాదించింది. భవిష్యత్తులో భారత్‌కు అందించే భద్రతా సహాయం, ద్వైపాక్షిక వాణిజ్య ఒప్పందాలను మత స్వేచ్ఛ మెరుగుదలతో ముడిపెట్టాలని సిఫార్సు చేసింది. పలు రాష్ట్రాల్లో బలవంతపు మత మార్పిడి నిరోధక చట్టాలను కఠినతరం చేయడంపై కూడా కమిషన్ ఆందోళన వ్యక్తం చేసింది.