మహారాష్ట్ర లోని నాగ్పూర్, కోరాడి ప్రాంతం, అరాంషిన్ వార్డు నంబర్ 2లో హోలీ పండుగ సమీపిస్తుండటంతో, ఓం హరీష్ వాంగే (4) అనే చిన్నారి ఇంటి బయట పెయింట్ నింపిన స్ప్రే బాటిల్తో ఆడుకుంటున్నాడు. అదే సమయంలో ఆ బాలుడి అమ్మమ్మ సింధు థాకరే, హోలీ వేడుకల కోసం నీటిని మరిగించి బకెట్లో నింపుతోంది. ఆడుకుంటూ చిన్నారి పొరపాటున తన స్ప్రే బాటిల్తో అమ్మమ్మపై రంగు చల్లాడు. తనపై రంగు పడిందన్న ఆగ్రహంతో విచక్షణ కోల్పోయి, చేతిలో ఉన్న మరుగుతున్న నీటిని ఆ పసివాడిపై పోసేసింది. వేడినీరు పడటంతో ఆ పసివాడు బాధ తో గిలగిలలాడిపోయాడు. నడుము కింద భాగమంతా తీవ్రంగా కాలిపోయింది. బాలుడి అరుపులు విన్న స్థానికులు వెంటనే అతడిని నాగ్పూర్లోని ఒక ప్రైవేట్ ఆసుపత్రికి తరలించారు. వైద్యుల అంచనా ప్రకారం, ఆ చిన్నారికి 45 శాతం కాలిన గాయాలు అయ్యాయి. ప్రస్తుతం ఆ బాలుడు ప్రాణాలతో పోరాడుతున్నాడు. మార్చి 3న జరిగిన ఘటనంతా అక్కడి సీసీ టీవీ కెమెరాలో రికార్డైంది. ఆ దృశ్యాలను చూస్తే ఎవరికైనా ఒళ్ళు గగుర్పొడుస్తుంది. ఈ ఘటనపై సమాచారం అందుకున్న కోరాడి పోలీసులు బుధవారం కేసు నమోదు చేసే ప్రక్రియను ప్రారంభించారు. సొంత మనవడిపైనే ఇంతటి క్రూరత్వానికి పాల్పడిన సింధు థాకరేపై కఠిన చర్యలు తీసుకుంటామని పోలీసులు తెలిపారు.
0 Comments