తండాలకు తారు రోడ్లు వేయాలని అధికారులకు తక్షణ ఆదేశాలు జారీ చేసిన ముఖ్యమంత్రి రేవంత్ రెడ్డి

హైదరాబాద్ లోని బంజారా భవన్ లో సంత్ శ్రీ సేవాలాల్ మహారాజ్ జయంతి ఉత్సవాల్లో తెలంగాణ ముఖ్యమంత్రి రేవంత్ రెడ్డి మాట్లాడుతూ తమ ప్రభుత్వం పాలకుల మాదిరిగా కాకుండా ప్రజలకు సేవకులుగా పని చేస్తుందని స్పష్టం చేశారు. గిరిజన తండాల రూపురేఖలు మార్చేందుకు ప్రభుత్వం కట్టుబడి ఉందని చెబుతూ, రాష్ట్రంలోని అన్ని తండాలకు తారు రోడ్లు (బీటీ రోడ్లు) వేయాలని అధికారులకు తక్షణ ఆదేశాలు జారీ చేశారు. మౌలిక వసతుల కల్పనలో భాగంగా ప్రతి తండాలో ప్రభుత్వ పాఠశాల భవనాలు నిర్మించడంతో పాటు, సోలార్ ప్లాంట్ల ద్వారా నిరంతర విద్యుత్ అందించేందుకు ప్రణాళికలు రచిస్తున్నట్లు వెల్లడించారు. బంజారా బిడ్డలు కేవలం భూములకే పరిమితం కాకుండా, విద్య, వృత్తి నైపుణ్యాలపై దృష్టి సారించాలని పిలుపునిచ్చారు. చదువు ద్వారానే సమాజంలో కీలక పదవులు, గౌరవం దక్కుతాయని, డాక్టర్లు, ఇంజనీర్లుగా ఎదిగి జాతికి పేరు తేవాలని సీఎం ఆకాంక్షించారు. సామాజిక న్యాయం విషయంలో తమ ప్రభుత్వం చిత్తశుద్ధితో ఉందని రేవంత్ రెడ్డి గుర్తుచేశారు. రాష్ట్రంలో ఎస్సీ జనాభా 17 శాతం ఉంటే, మంత్రివర్గంలో మాత్రం 30 శాతం పదవులు కట్టబెట్టామని గణాంకాలతో సహా వివరించారు. దళిత బిడ్డకు స్పీకర్ పదవిని, కీలక శాఖలను అప్పగించిన ఘనత కాంగ్రెస్ ప్రభుత్వానిదేనని పేర్కొన్నారు. ఎస్సీ వర్గీకరణ ద్వారా అన్ని వర్గాలకు మేలు చేశామని తెలిపారు. ఇదే సమయంలో మున్సిపల్ ఎన్నికల ఫలితాలపై విపక్షాల విమర్శలను ఆయన తిప్పికొట్టారు. పురపాలక శాఖ మంత్రిగా గెలుపు ఓటముల బాధ్యత తనదేనని, తన వ్యాఖ్యలను వక్రీకరించవద్దని సూచించారు. రానున్న ఫలితాల్లో కాంగ్రెస్ పార్టీ కచ్చితంగా 90 శాతం సీట్లు గెలుస్తుందని ధీమా వ్యక్తం చేశారు. శాంతి, అహింస, మానవత్వమే మార్గంగా జీవించిన గొప్ప సంఘ సంస్కర్త సేవాలాల్ మహారాజ్ అని సీఎం కొనియాడారు. 1739 ఫిబ్రవరి 15న జన్మించిన సేవాలాల్ చూపిన బాటలో ప్రతి ఒక్కరూ నడవాలని సూచించారు. తెలంగాణ ఉద్యమంలో లంబాడీల పాత్ర ఎంతో కీలకమని, సురేష్ నాయక్, కవిత వంటి వారి త్యాగాలను ఈ వేదికగా స్మరించుకున్నారు. సేవాలాల్ జయంతిని ప్రభుత్వం అధికారికంగా నిర్వహిస్తోందని, బంజారాల ఆత్మగౌరవ ప్రతీక అయిన బంజారా భవన్ వేదికగా ఈ వేడుకలు జరగడం సంతోషకరమని పేర్కొన్నారు. ఈ కార్యక్రమంలో భాగంగా బంజారాల సంప్రదాయం ప్రకారం నైవేద్యం (భోగ్) సమర్పించి ప్రత్యేక పూజలు నిర్వహించారు. కేవలం ఉత్సవాలకే పరిమితం కాకుండా, గిరిజనుల సమగ్ర అభివృద్ధికి ప్రభుత్వం ప్రత్యేక కార్యాచరణతో ముందుకు వెళ్తోందని సీఎం భరోసా ఇచ్చారు. బీజేపీ సహా ఇతర పార్టీలు కూడా తమ కార్యాలయాల్లో సేవాలాల్ జయంతిని నిర్వహించినప్పటికీ, ప్రభుత్వ లాంఛనాలతో అధికారికంగా జరపడం పట్ల బంజారా సంఘాలు హర్షం వ్యక్తం చేశాయి. తండాలను గ్రామ పంచాయతీలుగా మార్చిన స్ఫూర్తితోనే, వాటిని ఆదర్శ గ్రామాలుగా తీర్చిదిద్దుతామని సీఎం హామీ ఇచ్చారు.