డిసెంబర్ 31లోగా ఇందిరమ్మ ఇండ్ల దరఖాస్తుల పరిశీలనను పూర్తి చేయాలని ఆదేశం !

ఇందిరమ్మ ఇండ్ల పథకానికి సంబంధించి రాష్ట్ర రెవెన్యూ, గృహ నిర్మాణ శాఖల మంత్రి పొంగులేటి శ్రీనివాస్ రెడ్డి కీలక ఆదేశాలు జారీ చేశారు. ఇందిరమ్మ ఇళ్ల కోసం ప్రజాపాలన సందర్భంగా వచ్చిన 80 లక్షల దరఖాస్తుల పరిశీలనను డిసెంబర్ 31లోగా పూర్తి చేయాలని జిల్లాల కలెక్టర్లను ఆదేశించారు. ఇందిరమ్మ గృహనిర్మాణం, గ్రూప్‌-2 పరీక్షల నిర్వహణ, హాస్టళ్లలో ఆహార నాణ్యత తదితర అంశాలపై సచివాలయం నుంచి మంత్రి పొంగులేటి జిల్లాల కలెక్టర్‌లతో వీడియో కాన్ఫరెన్స్‌ నిర్వహించారు. ఈ సమావేశంలో ముఖ్యమంత్రి సలహాదారు వేం నరేందర్‌రెడ్డి, ప్రభుత్వ ప్రధాన కార్యదర్శి శాంతికుమారి, ఉన్నతాధికారులు పాల్గొన్నారు. ఈ సందర్భంగా మంత్రి పొంగులేటి మాట్లాడుతూ ఇందిరమ్మ ఇళ్ల కోసం ప్రజాపాలనలో వచ్చిన 80 లక్షల దరఖాస్తుల సర్వేను పూర్తిచేసి యాప్‌లో నమోదు చేయాలని చెప్పారు. డిసెంబర్ 31లోగా దరఖాస్తుల పరిశీలనను పూర్తి చేయాలని ఆదేశించారు. సర్వేలో ఇందిరమ్మ కమిటీ సభ్యులను భాగస్వామ్యం చేయాలని చెప్పారు. ఒక్క దరఖాస్తును కూడా వదలకుండా, ఎలాంటి తప్పులకు ఆస్కారం లేకుండా సర్వే నిర్వహించాలని స్పష్టం చేశారు. రోజూ కలెక్టర్లు సర్వే జరుగుతున్న తీరును సమీక్షించాలని తెలిపారు. సర్వే, సంబంధిత అంశాలపై ప్రజలు, ఇందిరమ్మ ఇళ్ల దరఖాస్తుదారుల నుంచి ఫిర్యాదులు, సూచనలు, సలహాలు స్వీకరించేందుకు ఆయా కలెక్టరేట్ కార్యాలయాల్లో టోల్ ఫ్రీ నంబర్లను ఏర్పాటు చేయాలని మంత్రి పొంగులేటి కలెక్టర్లను ఆదేశించారు. ఇందిరమ్మ ఇళ్ల కోసం 80 లక్షల దరఖాస్తుల పరిశీలన పూర్తి చేసి క్షేత్రస్థాయి సర్వే వివరాలను ఈ పథకం కోసం ప్రత్యేకంగా రూపొందించిన మొబైల్ యాప్‌లో అప్‌లోడ్ చేయాలని.. .ప్రతి 500 దరఖాస్తుల సర్వే బాధ్యతలను ఒక ఉద్యోగికి అప్పగించేలా కలెక్టర్లు చర్యలు తీసుకోవాలన్నారు. ఇందిరమ్మ ఇండ్ల నిర్మాణం నిరంతర ప్రక్రియ అని.. ఈ ఏడాది 4.5 లక్షల ఇండ్లను నిర్మించబోతున్నామని మంత్రి పొంగులేటి చెప్పారు. ఇక, తమ ప్రభుత్వం అధికారంలోకి వచ్చిన ఏడాది కాలంలోనే హాస్టల్ విద్యార్థులకు మెస్‌ఛార్జీలను 40 శాతం పెంచిందని, దీంతో 7.65 లక్షల మంది విద్యార్థులకు ప్రయోజనం కలుగుతుందని మంత్రి పొంగులేటి పేర్కొన్నారు. కలెక్టర్లు తరచూ హాస్టళ్లను తనిఖీ చేసి సరుకుల క్వాలిటీని పరిశీలించాలన్నారు. ఈ నెల 14న మంత్రులు, ఎంపీలు, ఎమ్మెల్యేలు, ఎమ్మెల్సీలు సంక్షేమ వసతి గృహాలను సందర్శించి అక్కడే విద్యార్థులతో కలిసి సహపంక్తి భోజనం చేస్తారని తెలిపారు. రాష్ట్రంలో 1.16 కోట్ల కుటుంబాలకు గాను 1.12 కోట్ల కుటుంబాల సామాజిక సర్వే పూర్తయిందని మంత్రి పొంగులేటి తెలిపారు. ఇంటింటి కులగణన సర్వేకు ఈ నెల13వ తేదీ చివరి గడువని, ఆ తర్వాత ప్రజాపాలన సేవా కేంద్రాల్లో కుటుంబ సర్వే వివరాలను నమోదు చేసుకోవచ్చని సూచించారు.