నా జీవితంలో సాధించిన విజయాల వెనుక, కష్టసమయాల్లో అండగా నిలిచిన వ్యక్తి జ్యోతికేనని నటుడు సూర్య మనసు విప్పి చెప్పారు. 'సీన్' సినిమా ఆడియో విడుదల కార్యక్రమంలో మాట్లాడుతూ జీవితంలో తాను ఎన్నో తప్పులు చేసినప్పటికీ, ఎప్పుడైనా కిందపడినప్పుడు చేయి అందించి పైకి లేపిన మంచి స్నేహితురాలు జ్యోతిక అని సూర్య పేర్కొన్నారు. ఒక అద్భుతమైన తల్లిగా, జీవిత భాగస్వామిగా ఆమె ఎప్పుడూ తనకు అండగా నిలుస్తోందని ప్రశంసించారు. వేదికపైనే భార్య చేతులు పట్టుకుని ఆమెను అభినందించిన సూర్య, జ్యోతిక ఎంతో ధైర్యవంతురాలైన నటి మాత్రమే కాకుండా, గొప్ప మనసున్న వ్యక్తి అని కొనియాడారు. ఆయన మాటలు అక్కడున్న ప్రేక్షకులను ఆకట్టుకున్నాయి. నిజ జీవితంలో భార్యాభర్తలు ఒకరికొకరు ఎలా తోడుగా నిలవాలో ఈ జంట చూపిస్తోందంటూ అభిమానులు ప్రశంసిస్తున్నారు. సూర్య తన భార్య గురించి మాట్లాడిన ఈ భావోద్వేగపూరిత వీడియో ప్రస్తుతం సోషల్ మీడియాలో చక్కర్లు కొడుతోంది.
