రేషన్ గోధుమల బస్తాలో జంతు కళేబరం : అధికారుల నిర్లక్ష్యంపై మండిపడుతున్న ప్రజలు!

మధ్యప్రదేశ్‌లోని టీకంగఢ్ జిల్లా, నన్నిదెహరి గ్రామంలో ప్రభుత్వ రేషన్ దుకాణం ద్వారా పంపిణీ చేసిన గోధుమల బస్తాలో జంతువు అస్థిపంజరం బయటపడటంతో ప్రజలు అధికారుల నిర్లక్ష్యంపై మండిపడుతున్నారు. కోమల్ లోధి అనే వ్యక్తి తన కుటుంబ అవసరాల కోసం ప్రభుత్వ రేషన్ దుకాణంలో  గోధుమలను తీసుకున్నాడు. ఇంటికి వెళ్లి గోధుమల మూటను విప్పగా, అందులో జంతువుకు చెందిన పుర్రె, ఎముకలు కనిపించాయి. ఇది చూసి కుటుంబ సభ్యులు షాక్ అయ్యారు. ప్రజల ఆగ్రహం: రేషన్ సరుకుల్లో ఇంత దారుణమైన అపరిశుభ్రత ఎలా ఉంటుందని ప్రశ్నిస్తూ, గ్రామస్తులు రేషన్ దుకాణం వద్దకు చేరుకుని నిరసన వ్యక్తం చేశారు. పేదల ఆరోగ్యంతో అధికారుల నిర్లక్ష్యం చెలగాటమాడుతోందని వారు తీవ్ర ఆగ్రహం వ్యక్తం చేశారు. ఈ ఘటనపై ఫిర్యాదులు రావడంతో అధికారులు అప్రమత్తమయ్యారు. ఆ ప్రాంతంలో రేషన్ పంపిణీని తక్షణమే నిలిపివేశారు. ప్రస్తుతం ఉన్న గోధుమల బస్తాలన్నింటినీ తిరిగి గోదాముకు పంపాలని ఆదేశించారు. ఈ మొత్తం వ్యవహారంపై ఉన్నత స్థాయి విచారణకు ప్రభుత్వం ఆదేశాలు జారీ చేసింది.