ప్రియురాలి బ్రేకప్‌ను జీర్ణించుకోలేక యువతిని దారుణంగా హత్య చేసిన ప్రియుడు !

పంజాబ్‌లోని మొహాలీలో గురువారం సాయంత్రం ఒక ప్రైవేట్ సంస్థ కార్యాలయంలో ప్రేమ నిరాకరించిందనే కక్షతో ఓ వ్యక్తి తనతో పాటు పనిచేస్తున్న మాజీ ప్రేమికురాలిని ఆఫీస్ సిబ్బంది కళ్లెదుటే కత్తితో పొడిచి దారుణంగా హత్య చేశాడు. అనంతరం అతడు కూడా అదే కత్తితో పొడిచుకుని ఆత్మహత్యా యత్నానికి పాల్పడ్డాడు. ఆఫీస్ ఆవరణలోని సీసీటీవీ కెమెరాల్లో ఈ భయానక దృశ్యాలన్నీ రికార్డయ్యాయి. పోలీసుల ప్రాథమిక విచారణ ప్రకారం పాటియాలాకు చెందిన డింపుల్ (30) అనే మహిళ, హర్జీందర్ సింగ్ మాన్ అలియాస్ హ్యారీ (39) అనే వ్యక్తి మొహాలీలోని ఒక ప్రైవేట్ కొరియర్ కంపెనీలో సహోద్యోగులుగా పనిచేస్తున్నారు. అక్కడ వీరిద్దరి మధ్య ఏర్పడిన పరిచయం కాస్తా ప్రేమగా మారింది. గత మూడేళ్లకు పైగా వీరిద్దరూ రిలేషన్‌షిప్‌లో ఉన్నారు. అయితే, కొన్ని వ్యక్తిగత కారణాల వల్ల కొంతకాలం క్రితం వీరిద్దరి మధ్య విభేదాలు రావడంతో డింపుల్ ఆ బంధాన్ని తెంచుకుని హర్జీందర్‌కు దూరంగా ఉంటోంది. బ్రేకప్‌ను జీర్ణించుకోలేకపోయిన హర్జీందర్ గత కొన్ని వారాలుగా డింపుల్‌ను మళ్లీ కలవాలంటూ తీవ్ర ఒత్తిడి తెచ్చాడు. ఆమె నిరాకరించడంతో తీవ్ర మానసిక ఆందోళనకు గురయ్యాడు. గురువారం రాత్రి ఆఫీస్ వేళల్లో వీరిద్దరి మధ్య మరోసారి తీవ్రమైన వాగ్వాదం చోటుచేసుకుంది. ఆగ్రహంతో ఊగిపోయిన హర్జీందర్.. తన వద్ద దాచుకున్న కత్తిని తీసి డింపుల్‌పై విచక్షణారహితంగా దాడి చేశాడు. ఆమె శరీరంపై పలుమార్లు కత్తితో పొడిచాడు. ఆఫీస్‌లోని తోటి ఉద్యోగులు అడ్డుకునేందుకు ప్రయత్నించినప్పటికీ ఫలితం లేకుండా పోయింది. డింపుల్ రక్తపు మడుగులో పడిపోగానే.. హర్జీందర్ అదే కత్తితో తనను తాను పొడుచుకుని ఆత్మహత్యకు యత్నించాడు. ఈ ఊహించని దారుణాన్ని చూసి షాక్‌కు గురైన తోటి ఉద్యోగులు రాత్రి 7:40 గంటల ప్రాంతంలో పోలీసులకు సమాచారం అందించారు. ఘటనా స్థలానికి చేరుకున్న ఫేజ్-11 పోలీస్ స్టేషన్ ఎస్‌హెచ్‌ఓ (SHO) అమన్ బైద్వాన్ బృందం.. తీవ్రంగా గాయపడిన ఇద్దరినీ తక్షణమే ఫోర్టిస్ ఆసుపత్రికి తరలించారు. అయితే, అప్పటికే తీవ్ర రక్తస్రావం కావడం వల్ల డింపుల్ మరణించినట్లు వైద్యులు ప్రకటించారు. తీవ్ర గాయాలపాలైన నిందితుడు హర్జీందర్ ప్రస్తుతం ఆసుపత్రిలో ప్రాణాపాయ స్థితిలో చికిత్స పొందుతున్నాడు. పోలీసులు ఈ ఘటనపై హత్య కేసు నమోదు చేసి దర్యాప్తు ప్రారంభించారు. ఘటనా స్థలాన్ని సీల్ చేసి ఫోరెన్సిక్ ఆధారాలను సేకరించారు. ఆఫీస్‌లోని సీసీటీవీ ఫుటేజీని స్వాధీనం చేసుకుని, హంతకుడికి శిక్ష పడేలా బలమైన సాక్ష్యాలను సిద్ధం చేస్తున్నారు. యువతి తల్లిదండ్రులకు సమాచారం అందించామని, వారు వచ్చిన తర్వాత పూర్తి వివరాలు సేకరిస్తామని అధికారులు వెల్లడించారు.