నల్లగొండ హత్య కేసు : సఫారీ ఇచ్చి చంపించిన కుమార్తె, అల్లుడు

తెలంగాణలోని నల్లగొండలో తీవ్ర సంచలనం సృష్టించిన ఒకే ఇంట్లో నలుగురు అనుమానాస్పద మృతి కేసు సుపారీ హత్యోదంతంగా తేలింది. సాగర్ రోడ్డులోని తెలంగాణ కాలనీలో కుళ్లిన స్థితిలో లభ్యమైన నాలుగు మృతదేహాల వెనుక ఆస్తి కక్కుర్తి, తీవ్రమైన కుటుంబ కలహాలు ఉన్నట్లు జిల్లా పోలీస్ యంత్రాంగం నిర్ధారించింది. మొదట ఈ ఘటనను పురుగుల మందు తాగి ఆత్మహత్య చేసుకున్నట్లుగా అనుమానించినప్పటికీ, లోతుగా దర్యాప్తు చేయడంతో హైదరాబాద్ పాతబస్తీకి చెందిన సుపారీ గ్యాంగ్ దారుణంగా కత్తులతో పొడిచి చంపినట్లు తేలింది. హత్యకు గురైన హసీనా మొదటి భర్త కుమార్తె, ఆమె అల్లుడే కలిసి ఈ ఘాతుకానికి వ్యూహరచన చేసినట్లు పోలీసులు ఛేదించారు. నల్లగొండ పట్టణంలో బ్యాగుల వ్యాపారం చేసుకుంటూ జీవనం సాగిస్తున్న షేక్ మహమ్మద్ సుల్తాన్ (45), ఆయన భార్య హసీనా (40), కుమారుడు మహ్మద్ ముజమిల్ (20), కుమార్తె అక్సరా (11) నివాసం ఉంటున్న ఇల్లు గత రెండు రోజులుగా మూసి ఉంది. బుధవారం సాయంత్రం ఆ ఇంట నుండి తీవ్రమైన దుర్వాసన వస్తుండటంతో స్థానికులు వెంటనే పోలీసులకు సమాచారం అందించారు. ఘటనా స్థలానికి చేరుకున్న పోలీసులు తలుపులు పగులగొట్టి లోపలికి వెళ్లి చూడగా.. ఇద్దరు పురుషులు, ఇద్దరు మహిళల మృతదేహాలు పూర్తిగా కుళ్లిన స్థితిలో రక్తపు మడుగులో లభ్యమయ్యాయి. ప్రాథమికంగా అక్కడ పురుగుల మందు డబ్బాలు కనిపించడంతో ఆత్మహత్యగా భావించినప్పటికీ.. పోస్టుమార్టం నివేదిక మరియు క్లూస్ టీమ్ ఆధారాలు చూసి పోలీసులు సైతం దిగ్భ్రాంతి చెందారు. ఆ నలుగురిని అత్యంత క్రూరంగా కత్తులతో పొడిచి చంపినట్లు తేలింది: ఈ దాడి జరుగుతున్న సమయంలో భయంతో వణికిపోయిన 11 ఏళ్ల చిన్నారి అక్సరా ప్రాణాలు కాపాడుకోవడానికి మంచం కింద దాక్కుందని, అయితే హంతకులు ఆమెను బయటకు ఈడ్చి చంపారని పోలీసులు నిర్ధారించారు. అందుకే ఆమె మృతదేహం సగం మంచం కింద దొరికిందని పోలీసులు తెలిపారు. ఈ సామూహిక హత్యల వెనుక ఉన్న అసలు కారణం కోట్ల విలువైన ఆస్తి వివాదమేనని దర్యాప్తులో తేలింది. హసీనాకు గతంలో రెండు పెళ్లిళ్లు జరగ్గా.. నల్లగొండకు చెందిన మహ్మద్ సుల్తాన్‌ను ఆమె మూడో వివాహం చేసుకుంది. అటు సుల్తాన్‌కు కూడా గతంలో రెండు పెళ్లిళ్లు అయ్యాయి. సుల్తాన్ మొదటి భార్య పిల్లలైన ముజమిల్, అక్సరాను తన సొంత పిల్లల్లా చూసుకుంటూ హసీనా నల్లగొండలో ఉంటున్నారు. హసీనా పేరిట నల్లగొండ, హైదరాబాద్ పరిసరాలలో సుమారు కోటి రూపాయల విలువైన ఇల్లు, ఖరీదైన స్థలాలు ఉన్నాయి. ఈ ఆస్తిని తన మొదటి భర్తకు పుట్టిన కూతురు, అల్లుడికి ఇవ్వడానికి హసీనా నిరాకరించింది. అంతేకాకుండా, ఆ కోటి రూపాయల ఆస్తి మొత్తాన్ని తన మూడో భర్త పిల్లలైన ముజమిల్, అక్సరా పేరిట 'వీలునామా' రాస్తున్నట్లు హసీనా తెగేసి చెప్పింది. దీంతో తీవ్ర ఆగ్రహం, కక్ష పెంచుకున్న మొదటి భర్త కూతురు, ఆమె భర్త ఎలాగైనా హసీనా కుటుంబాన్ని తుడిచిపెట్టాలని భావించాడు. అల్లుడు, కూతురు కలిసి హైదరాబాద్ పాతబస్తీకి చెందిన నలుగురు రౌడీ షీటర్లను ఆశ్రయించారు. వారికి భారీ మొత్తంలో సుపారీ మాట్లాడి నల్లగొండకు పంపించారు. పక్కా స్కెచ్ ప్రకారం అర్ధరాత్రి వేళ ఇంట్లోకి చొరబడిన ఈ సుపారీ గ్యాంగ్ఎ దురుతిరిగిన ముజమిల్‌ను 16 పోట్లు పొడిచి, ఆపై ఇంట్లోని నలుగురిని దారుణంగా నరికి చంపి, ఆత్మహత్యగా చిత్రీకరించేందుకు పురుగుల మందు చల్లి పరారయ్యారు. ఈ ఘోర కలికలంపై కేసు నమోదు చేసిన నల్లగొండ పోలీసులు ప్రత్యేక సీసీటీవీ బృందాల ఆధారంగా నిందితుల కదలికలను గుర్తించారు.