ముంబై ఐఐటీ క్యాంపస్‌లో చిరుతపులి !

ఇండియన్ ఇన్‌స్టిట్యూట్ ఆఫ్ టెక్నాలజీ (ఐఐటీ) బాంబే క్యాంపస్‌లో చిరుతపులి కలకలం రేపింది. పవాయ్ ప్రాంతంలో ఉన్న ఈ ప్రతిష్ఠాత్మక విద్యాసంస్థలోని స్టాఫ్ హాస్టల్ ప్రాంగణంలో తెల్లవారుజామున సుమారు 2 గంటల సమయంలో ఒక చిరుతపులి వీధికుక్కపై దాడి చేసి ప్రాణాలు తీసింది. ఈ ఘటన అక్కడ అమర్చిన సీసీటీవీ కెమెరాలో స్పష్టంగా రికార్డైంది. ఈ దృశ్యాలు సామాజిక మాధ్యమాల్లోకి రావడంతో క్యాంపస్ వర్గాల్లో తీవ్ర కలవరం మొదలైంది. సీసీటీవీ ఫుటేజీ పరిశీలిస్తే హాస్టల్ మెట్ల దరిదాపుల్లో ఒక కుక్క నిలబడి ఉంది. ఏదో ప్రమాదాన్ని ముందుగానే ఊహించినట్లు అది ఒకే వైపు చూస్తూ అమితమైన అప్రమత్తతతో కనిపించింది. అంతలోనే చీకటి చాటు నుంచి ఒక్కసారిగా దూసుకొచ్చిన చిరుతపులి ఆ కుక్కపై మెరుపువేగంతో దాడి చేసింది. ఆ కుక్క తప్పించుకోవడానికి ఎంతగానో ప్రయత్నించినప్పటికీ, చిరుత దాన్ని గట్టిగా పట్టుకుని మెడ కరచి చంపేసింది. ఆపై నిమిషాల వ్యవధిలోనే ఆ కళేబరాన్ని నోట కరచుకుని అక్కడి నుంచి చీకట్లోకి లాక్కెళ్లిపోయింది. ఈ భయానక ఉదంతంతో క్యాంపస్‌లో నివసిస్తున్న విద్యార్థులు, ప్రొఫెసర్లు, సిబ్బంది మరియు వారి కుటుంబసభ్యులు తీవ్ర ఆందోళన చెందుతున్నారు. ముఖ్యంగా రాత్రి వేళల్లో ఒంటరిగా బయటకు రావడానికి జంకుతున్నారు. తాము పెంచుకునే పెంపుడు జంతువుల రక్షణపై కూడా ఆందోళన వ్యక్తం చేస్తున్నారు. క్యాంపస్ లోపల తిరిగే సమయంలో తగిన జాగ్రత్తలు తీసుకోవాలని ఒకరికొకరు సూచించుకుంటున్నారు.