గుజరాత్‌లో చాట్‌జీపీటీతో చర్చించి ఇద్దరు యువతులు ఆత్మహత్య : ఇది ఎంతో భయంకర సంఘటన : ఎలాన్ మస్క్

గుజరాత్‌లోని సూరత్ నగరానికి చెందిన 18, 20 ఏళ్ల ఇద్దరు యువతులు ఇటీవల ఆత్మహత్య చేసుకున్నారు. పోలీసులు వారి ఫోన్లను తనిఖీ చేయగా విస్తుపోయే నిజాలు బయటపడ్డాయి. తాము చనిపోవడానికి ఏ మందులు వాడాలి, ఎలా ప్రాణాలు తీసుకోవాలి అనే అంశాలపై వారు చనిపోయే ముందు చాట్‌జీపీటీతో చర్చించినట్లు ప్రాథమిక దర్యాప్తులో తేలింది. ఈ విషాదకర ఘటనపై సోషల్ మీడియా ప్లాట్‌ఫామ్ ‘ఎక్స్’ వేదికగా ఎలాన్ మస్క్ స్పందించారు. ఒక నెటిజన్ పంచుకున్న ఈ వార్తకు ఆయన ‘ఇది ఎంతో భయంకర సంఘటన’ అంటూ రిప్లై ఇచ్చారు. నిజానికి చాట్‌జీపీటీ, గూగుల్ జెమినీ  వంటి ఏఐ సాధనాలు ఆత్మహత్యలకు సంబంధించిన ప్రశ్నలకు సమాధానాలు ఇవ్వవు. ఎవరైనా అలాంటి ప్రశ్నలు అడిగితే వెంటనే హెల్ప్‌లైన్ నంబర్లను చూపిస్తాయి. మరి ఈ కేసులో ఆ యువతులు ఏఐ నుండి సమాచారాన్ని ఎలా పొందారు? టెక్నాలజీలోని లోపాలను వాడుకున్నారా లేదా ప్రశ్నలను మార్చి అడిగి సమాధానాలు రాబట్టారా? అన్న కోణంలో పోలీసులు లోతుగా దర్యాప్తు చేస్తున్నారు. పెరిగిపోతున్న సాంకేతిక ముప్పు:సాంకేతికత ఎంత పెరిగినా, దాన్ని వాడే విధానంపైనే అంతా ఆధారపడి ఉంటుంది. ముఖ్యంగా యువత మానసిక ఒత్తిడిలో ఉన్నప్పుడు ఇలాంటి ఏఐ సాధనాలపై ఆధారపడటం ప్రమాదకరమని నిపుణులు హెచ్చరిస్తున్నారు. ఏఐ కంపెనీలు తమ ప్లాట్‌ఫామ్స్‌లో భద్రతా ప్రమాణాలను మరింత కఠినతరం చేయాల్సిన అవసరం ఉందని ఈ ఘటన గుర్తుచేస్తోంది.