లాక్‌డౌన్ విధించే ప్రతిపాదన : పూర్తిగా అబద్ధమన్న కేంద్ర పెట్రోలియం మంత్రి హర్దీప్ సింగ్ పూరి

దేశంలో లాక్‌డౌన్ విధించే ఎలాంటి ప్రతిపాదన ప్రభుత్వం వద్ద లేదని కేంద్ర పెట్రోలియం మంత్రి హర్దీప్ సింగ్ పూరి తెలిపారు. వంటగ్యాస్ కొరత కారణంగా దేశవ్యాప్తంగా పూర్తి లాక్‌డౌన్ విధిస్తారనే వార్తలు సోషల్ మీడియాలో వైరల్ అవుతున్న నేపథ్యంలో ప్రజలు ఈ రూమర్లను నమ్మవద్దని, భయపడాల్సిన అవసరం లేదని మంత్రి పేర్కొన్నారు. ఇటీవల పశ్చిమాసియాలో జరుగుతున్న ఉద్రిక్త పరిస్థితులు, ముఖ్యంగా యుద్ధం కారణంగా ఇంధన సరఫరా మార్గాల్లో సమస్యలు ఏర్పడుతున్నాయని వార్తలు వస్తున్నాయి. ఈ నేపథ్యంలో వంటగ్యాస్ సరఫరా దెబ్బతింటుందని, అందుకే దేశంలో లాక్‌డౌన్ విధించవచ్చని కొన్ని వదంతులు వ్యాపించాయి. కానీ ప్రభుత్వం అలాంటి పరిస్థితి లేదని స్పష్టంగా తెలిపింది. ప్రస్తుతం దేశంలో ఇంధన భద్రత బలంగా ఉందని, పెట్రోల్, డీజిల్, ఎల్పీజీ సరఫరా నియంత్రణలోనే ఉందని అధికారులు చెబుతున్నారు. దేశంలో తగినంత ఇంధన నిల్వలు కూడా ఉన్నాయని కేంద్రం వెల్లడించింది. అందువల్ల దేశంలో లాక్‌డౌన్ విధించే పరిస్థితి లేదని, ప్రజలు తప్పుడు సమాచారం పంచకుండా జాగ్రత్తగా ఉండాలని ప్రభుత్వం సూచించింది.