దేశంలో అసాధారణ వాతావరణం

దేశంలో ఏప్రిల్-మే నెలలను వేసవి కాలంగా పరిగణించినప్పటికీ, గత కొన్ని ఏళ్లుగా ఫిబ్రవరి చివరలోనే ఎండలు మొదలవుతున్నాయి. కానీ ఈసారి భారత్, పాకిస్తాన్, ఆఫ్ఘనిస్తాన్ అంతటా అసాధారణ వాతావరణం నెలకొంది. దీనివల్ల వేసవి ప్రారంభం కావాల్సిన మార్చిలో ఉరుములు, మెరుపులతో కూడిన గాలులు, భారీ వర్షాలు, కొన్నిచోట్ల వడగళ్ల వానలు కూడా కురుస్తున్నాయి. ఆఫ్ఘనిస్తాన్ నుండి పాకిస్తాన్ మీదుగా భారతదేశం వరకు సుమారు వెయ్యి  కిలోమీటర్ల పొడవునా ఈ వర్ష మేఘాలు విస్తరించాయి. సాధారణంగా 'వెస్ట్రన్ డిస్టర్బెన్స్' వల్ల శీతాకాలంలో మంచు, చలి పెరుగుతాయి. కానీ ఇప్పుడు ఏర్పడిన 'స్ట్రెయిట్ ట్రఫ్' వల్ల ఈ వింత వాతావరణం ఏర్పడింది. వాతావరణ మార్పుల కారణంగా ఇలాంటి ఊహించని మార్పులు సంభవిస్తున్నాయి. పాకిస్థాన్ మీదుగా ఉన్న తీవ్రమైన పశ్చిమ దిశ సుడిగుండం వల్ల ఉత్తర భారతదేశంలో గంటకు 40-80 కి.మీ వేగంతో గాలులు వీస్తున్నాయి. హిమాచల్ ప్రదేశ్, పశ్చిమ బెంగాల్, సిక్కింలలో ఇప్పటికే భారీ వర్షాలు నమోదయ్యాయి. దక్షిణాన కర్ణాటక, ఆంధ్రప్రదేశ్, కేరళ, తమిళనాడులో కూడా వానలు కురుస్తున్నాయి. మధ్యధరా సముద్రం, కాస్పియన్ సముద్రం, పర్షియన్ గల్ఫ్ ప్రాంతాల నుండి వచ్చే తేమ హిమాలయాల భౌగోళిక నిర్మాణం వల్ల మరింత పెరిగి, భారీ వర్షాలకు దారితీస్తోంది. రాబోయే రోజుల్లో కూడా ఉత్తర భారతదేశంలో వర్షాలు కొనసాగే అవకాశం ఉంది.