భోజనం చేస్తున్న కూలీల పైకి దూసుకుపోయిన కారు : ఇద్దరు మృతి, 20మందికి గాయాలు

మధ్యప్రదేశ్‌లోని జబల్‌పూర్‌లో రోడ్డు పక్కన భోజనం చేస్తున్న కార్మికులపై వేగంగా వచ్చిన కారు దూసుకెళ్లడంతో ఇద్దరు ప్రాణాలు కోల్పోగా, మరో ఇరవై మంది గాయపడ్డారు. మృతి చెందిన వారిలో  ఇద్దరు మహిళా కార్మికులు ఉన్నారు. వేగంగా వెళ్తున్న కారు అకస్మాత్తుగా నియంత్రణ కోల్పోవడంతో ఈ ప్రమాదం జరిగిందని పోలీసులు తెలిపారు. ఈ సంఘటన స్థలంలో తీవ్ర భయానక వాతావరణం నెలకొంది. అటుగా వెళ్తున్న ప్రయాణికులు, పోలీసులు గాయపడిన వారిని ఆసుపత్రికి తరలించారు. ఐదుగురు పరిస్థితి విషమంగా ఉన్నట్లు సమాచారం. జబల్పూర్‌లోని బరేలా హైవేపై వేగంగా వచ్చిన క్రెటా కారు గందరగోళానికి కారణమైంది. రోడ్డు పక్కన కూర్చుని భోజనం చేస్తున్న కార్మికులపై కారు వేగంగా దూసుకుపోయింది. సంఘటనా స్థలానికి చేరుకున్న పోలీసులు గాయపడిన వారిని అంబులెన్స్‌లో ఆసుపత్రికి తరలించారు. కార్మికులు హైవేపై గ్రిల్‌కు పెయింట్ వేస్తున్నారు. గుర్తు తెలియని డ్రైవర్‌పై పోలీసులు కేసు నమోదు చేశారు. అతని కోసం వెతకడం ప్రారంభించారు.