మృత్యువు నుంచి ఆ దేవుడే నన్ను రక్షించాడు !

ప్రాణాపాయం నుంచి దేవుడే తనని రక్షించాడని అమెరికా మాజీ అధ్యక్షుడు డొనాల్డ్‌ ట్రంప్‌ అన్నారు. వెంట్రుక వాసిలో మృత్యువు నుంచి బయటపడ్డానని తెలిపారు. అమెరికా ప్రజలంతా ఐక్యంగా ఉండాలని పిలుపునిచ్చారు. అల్లర్లు చోటు చేసుకోకుండా సంయమనం పాటించాలని కోరారు. '' ఊహించని పరిణామం నుంచి ఆ దేవుడే నన్ను కాపాడాడు. ఎలాంటి అల్లర్లకు తావివ్వకుండా అమెరికా ప్రజలంతా ఐక్యం కావాలి'' అని సామాజిక మాధ్యమం ద్వారా ఆదివారం ట్రంప్‌ పిలుపునిచ్చారు. అమెరికా కాలమానం ప్రకారం.. శనివారం సాయంత్రం 6.15 సమయంలో పెన్సిల్వేనియాలో ట్రంప్‌ ఎన్నికల ప్రచారం నిర్వహిస్తుండగా.. దుండగుడు కాల్పులు జరిపిన సంగతి తెలిసిందే. దీంతో ఆయన ఒక్కసారిగా స్టేజిపై పడిపోయారు. చెవికి స్వల్పంగా గాయమైంది. భద్రతా సిబ్బంది వెంటనే ట్రంప్‌ చుట్టూ రక్షణగా చేరి.. వేదికై నుంచి దించి ఆస్పత్రికి తరలించారు. ఆయనకు ఎలాంటి ప్రమాదం లేదని వైద్యులు వెల్లడించారు. కాగా, ఈ ఘటనకు పాల్పడిన యువకుడిని భద్రతాబలగాలు హతమార్చాయి. దుండగుడు జరిపిన కాల్పుల్లో ట్రంప్‌ మద్దతుదారు ఒకరు మృతి చెందగా.. మరో ఇద్దరు తీవ్రంగా గాయపడ్డారు.