800 ఏళ్ల నాటి శివాలయం ఆలయం కూల్చివేత : కేంద్ర పురావస్తు శాఖ కేసులు నమోదు

తెలంగాణలోని వరంగల్ జిల్లా ఖానాపురం మండలంలోని అశోక్ నగర్‌లో ఉన్న 800 ఏళ్ల నాటి చారిత్రక కాకతీయ ఆలయం ధ్వంసం కావడం ఇప్పుడు దేశవ్యాప్తంగా చర్చనీయాంశమైంది. ఈ ఘటనపై భారత ప్రభుత్వ సాంస్కృతిక మరియు పురావస్తు శాఖ కేసులు నమోదు చేసినట్లు తెలుస్తోంది. సమీకృత పాఠశాల నిర్మాణంలో భాగంగా పురాతన శివాలయాన్ని బుల్డోజర్లతో కూల్చివేసిన వ్యవహారంపై తెలంగాణ హక్కుల న్యాయవాది రామారావు ఇమ్మనేని నేషనల్ మాన్యుమెంట్స్ అథారిటీకి ఫిర్యాదు చేయడంతో ఈ చర్యలు ప్రారంభమయ్యాయి. ఈ ఆలయంలో ఫిబ్రవరి 1231 నాటి అత్యంత అరుదైన శాసనం ఉండేది. ఇందులో కాకతీయ చక్రవర్తి గణపతిదేవుడిని 'మహారాజ', 'రాజాధిరాజులు' అని సంబోధించినట్లు చరిత్రకారులు పేర్కొంటున్నారు. ఏడు వరుసల ఈ తెలుగు శాసనాన్ని 1965లోనే వారసత్వ శాఖ డాక్యుమెంట్ చేసినప్పటికీ, ప్రస్తుతం ఆలయంతో పాటు ఇది కూడా కనుమరుగైపోయింది. ఈ ప్రాంతం 'కోట కట్ట' మట్టి కోట ప్రాంతంలో భాగంగా ఉండేదని, చుట్టూ చారిత్రక చెరువులు, కోట గోడలు ఉండేవని చరిత్రకారులు ఆవేదన వ్యక్తం చేస్తున్నారు. వారసత్వ కట్టడాన్ని ధ్వంసం చేయకుండానే పాఠశాల నిర్మించే అవకాశం ఉన్నా అధికారులు నిర్లక్ష్యంగా వ్యవహరించారని విమర్శలు వెల్లువెత్తుతున్నాయి. తెలంగాణ వారసత్వ చట్టం కింద ప్రభుత్వం హెరిటేజ్ కన్జర్వేషన్ కమిటీని ఏర్పాటు చేయడంలో విఫలమైందనే ఆరోపణలు వస్తున్నాయి. ఈ ఘటనపై వరంగల్ కలెక్టర్ డాక్టర్ సత్య శారదతో పాటు పురావస్తు శాఖ ఉన్నతాధికారి జయేష్ రంజన్‌లను బాధ్యులను చేస్తూ విచారణ జరిపించాలని బాధితులు డిమాండ్ చేస్తున్నారు. చట్టంలోని సెక్షన్ 30 ప్రకారం బాధ్యులైన అధికారులపై కఠిన చర్యలు తీసుకోవాలని ఫిర్యాదులో పేర్కొన్నారు. ఈ ఉదంతం తెలంగాణలోని ఇతర చారిత్రక కట్టడాల పరిరక్షణపై ఆందోళనను రేకెత్తిస్తోంది.