జాతీయ రహదారుల విస్తరణ కోసం తెలుగు రాష్ట్రాలపై ప్రత్యేక దృష్టి సారించిన కేంద్ర ప్రభుత్వం

కేంద్ర ప్రభుత్వం జాతీయ రహదారుల విస్తరణ కోసం తెలుగు రాష్ట్రాలపై ప్రత్యేక దృష్టి సారించింది. గత ఐదేళ్లల్లో ఆంధ్రప్రదేశ్ లో రహదారుల నిర్మాణం, నిర్వహణ కోసం రూ.  40,345 కోట్లు, తెలంగాణకు రూ. 23,668 కోట్లు కేటాయించినట్లు కేంద్ర మంత్రి నితిన్ గడ్కరీ స్పష్టం చేశారు. ఈ నిధుల ద్వారా ఉమ్మడి రాష్ట్రాల వ్యాప్తంగా వేల కిలోమీటర్ల మేర కొత్త రహదారులు అందుబాటులోకి రావడమే కాకుండా, ప్రధాన నగరాల మధ్య ప్రయాణ సమయం గణనీయంగా తగ్గనుంది. మౌలిక సదుపాయాల కల్పనలో భాగంగా చేపట్టిన ఈ ప్రాజెక్టులు ఇరు రాష్ట్రాల పారిశ్రామిక రంగానికి కొత్త ఊపునిస్తాయని ప్రభుత్వం భావిస్తోంది. తెలంగాణ రాష్ట్రానికి సంబంధించి కేంద్రం భారీ లక్ష్యాలను నిర్దేశించుకుంది. గడిచిన ఐదేళ్లలో తెలంగాణలో మొత్తం 1,854 కిలోమీటర్ల నిడివితో 84 జాతీయ రహదారి ప్రాజెక్టులను మంజూరు చేసింది. ఇందులో ఇప్పటికే పలు పనులు పూర్తి కాగా, ప్రస్తుతం 39 ప్రాజెక్టులు వివిధ నిర్మాణ దశల్లో ఉన్నాయని మంత్రి వివరించారు. ఈ హైవేల ద్వారా హైదరాబాద్‌తో పాటు రాష్ట్రంలోని మారుమూల జిల్లాలకు మెరుగైన కనెక్టివిటీ లభించనుంది. ముఖ్యంగా రీజినల్ రింగ్ రోడ్డు వంటి భారీ ప్రాజెక్టులు తెలంగాణ రవాణా ముఖచిత్రాన్ని మార్చబోతున్నాయి. భూసేకరణ మరియు ఇతర సాంకేతిక అనుమతులు వేగవంతం చేయడం ద్వారా మిగిలిన పనులను కూడా త్వరగా పూర్తి చేయాలని కేంద్రం లక్ష్యంగా పెట్టుకుంది.