కెనడా, బ్రిటన్‌లకు ఫ్రీ వీసా కల్పించిన చైనా

కెనడా, బ్రిటన్ పౌరులకు వీసా లేకుండా చైనా ప్రభుత్వం దేశంలోకి ఎంట్రీ కల్పిస్తుంది. చైనా విదేశాంగ మంత్రిత్వ శాఖ ఆదివారం ఈ కొత్త విధానాన్ని ప్రకటించింది. మంత్రిత్వ శాఖ ప్రకారం ఈ నియమం ఫిబ్రవరి 17 నుంచి అమల్లోకి వస్తుంది. ఇది ఈ ఏడాది చివరి వరకు అమలులో ఉంటుంది. కెనడా, బ్రిటిష్ పాస్‌పోర్ట్ హోల్డర్లు ఇప్పుడు వీసా లేకుండా గరిష్టంగా 30 రోజులు చైనాలో ఉండగలరు. ఇక వారు వ్యాపారం, పర్యాటకం లేదా స్నేహితులు, కుటుంబ సభ్యులను కలవడానికి ఎలాంటి వీసా లేకుండా చైనాకు ప్రయాణించవచ్చు. కెనడియన్ ప్రధాన మంత్రి మార్క్ కార్నీ, బ్రిటిష్ ప్రధాన మంత్రి కీర్ స్టార్మర్ ఇటీవల చైనాను సందర్శించిన తర్వాత ఈ ప్రకటన రావడం విశేషం. ఈ పర్యటనల తర్వాత చైనా ఈ రెండు దేశాలతో సంబంధాలను మెరుగుపరచడం లక్ష్యంగా తాజాగా నిర్ణయం తీసుకున్నట్లు విశ్లేషకులు అభిప్రాయపడుతున్నారు. ది ఫైవ్ ఐస్ అనేది యునైటెడ్ స్టేట్స్, బ్రిటన్, కెనడా, ఆస్ట్రేలియా, న్యూజిలాండ్‌లతో కూడిన గూఢచార భాగస్వామ్య సమూహం. ఇది పాశ్చాత్య దేశాలకు కీలకమైన భద్రతా కూటమిగా పరిగణించబడుతుంది. ఈ సమూహంలో చైనా వీసా రహిత ప్రయాణాన్ని మంజూరు చేయని ఏకైక దేశం ఇప్పుడు యునైటెడ్ స్టేట్స్. చైనా గతంలో జూలై 2024లో ఆస్ట్రేలియా, న్యూజిలాండ్ పౌరులకు వీసా-రహిత ప్రవేశాన్ని మంజూరు చేసింది. దీని ప్రకారం.. నాలుగు ఫైవ్ ఐస్ దేశాల పౌరులు (బ్రిటన్, కెనడా, ఆస్ట్రేలియా, న్యూజిలాండ్) ఇప్పుడు 30 రోజుల వరకు వీసా లేకుండా చైనాకు ప్రయాణించవచ్చు. చైనా తీసుకున్న తాజా నిర్ణయం కొన్ని పాశ్చాత్య దేశాలతో తన సంబంధాలను బలోపేతం చేసుకోవడానికి చేస్తున్న దౌత్య ప్రయత్నాల్లో భాగమే నిపుణులు భావిస్తున్నారు. అయితే ఈ సౌకర్యం నుంచి అమెరికాను మినహాయించడం రెండు దేశాల మధ్య కొనసాగుతున్న ఉద్రిక్తతలను కూడా ప్రతిబింబిస్తుందని సూచిస్తున్నారు. చైనా ఇప్పుడు ప్రపంచవ్యాప్తంగా దాదాపు 75 దేశాల పౌరులకు వీసా రహిత ప్రవేశాన్ని మంజూరు చేసింది. అంటే ఈ దేశాల పౌరులు కొన్ని షరతులకు లోబడి 30 రోజుల వరకు వీసా లేకుండా చైనాలో ఉండగలరు. ఈ నిర్ణయం చైనా కొత్త ఓపెన్ ట్రావెల్ పాలసీలో భాగం, ఇది ప్రపంచవ్యాప్తంగా ఉన్న ప్రయాణికులను ఆకర్షించడం, అంతర్జాతీయ సంబంధాలను బలోపేతం చేయడం లక్ష్యంగా పెట్టుకుందని చైనా అధికారులు వర్గాలు పేర్కొంటున్నాయి.