రాజ్యసభలో జేపీ నడ్డా - మల్లికార్జున ఖర్గే మధ్య తీవ్ర వాగ్వాదం

రాజ్యసభలో రాష్ట్రపతి ప్రసంగానికి ధన్యవాద తీర్మానంపై చర్చ సందర్భంగా అధికార పార్టీ, ప్రతిపక్షాల మధ్య వాగ్వాదం జరిగింది. దీంతో  తీవ్ర ఉద్రిక్త వాతావరణం నెలకొంది. సభా నాయకుడు జేపీ నడ్డా, ప్రతిపక్ష నాయకుడు మల్లికార్జున ఖర్గే పరస్పరం తీవ్ర వ్యాఖ్యలు చేసుకున్నారు. చర్చ సమయంలో ఖర్గే సభా కార్యకలాపాలకు అంతరాయం కలిగిస్తున్నారని జెపి నడ్డా ఆరోపించారు. కాంగ్రెస్ పార్టీని ఒక అమాయక వ్యక్తికి బందీగా మార్చవద్దని ఆయన వ్యాఖ్యానించారు. ఈ వ్యాఖ్యలు నేరుగా లోక్‌సభ ప్రతిపక్ష నాయకుడు రాహుల్ గాంధీని ఉద్దేశించి చేసినవేనని స్పష్టమైంది. అమాయకత్వం అహంకారంతో కలిసినప్పుడు అది ప్రమాదకరమవుతుందని జెపి నడ్డా అన్నారు. కాంగ్రెస్ పార్టీ ఆ పరిస్థితి నుంచి బయటపడాలని కూడా సూచించారు. ఈ వివాదానికి మూలకారణం లోక్‌సభలో గత కొన్ని రోజులుగా జరుగుతున్న పరిణామాలేనని రాజకీయ వర్గాలు చెబుతున్నాయి. లోక్‌సభలో ప్రతిపక్ష నాయకుడు రాహుల్ గాంధీ, మాజీ సైన్యాధిపతి ఎం ఎం నరవణే రచించిన భారత్-చైనా సంబంధాలపై ఉన్న పుస్తకం నుంచి కొన్ని అంశాలను చదవాలని పట్టుబట్టారు. అయితే సభాధ్యక్షుడు ఈ అంశం సున్నితమైనదని భావించి అనుమతి ఇవ్వలేదు. ఈ నిర్ణయాన్ని నిరసిస్తూ ప్రతిపక్షం ఆందోళనకు దిగడంతో గత నాలుగు రోజులుగా లోక్‌సభలో పనులు సజావుగా సాగలేదు. బుధవారం జరిగిన సమావేశంలో కూడా ఇదే పరిస్థితి కొనసాగింది. ప్రతిపక్ష సభ్యుల నిరసనల కారణంగా రాష్ట్రపతి ప్రసంగంపై చర్చకు ప్రధాని నరేంద్ర మోదీ స్పందించలేకపోయారు. ఈ పరిణామాలు పార్లమెంట్ కార్యకలాపాలపై తీవ్ర ప్రభావం చూపించాయి. గురువారం రాజ్యసభ ప్రారంభమైన వెంటనే మరోసారి గందరగోళం చెలరేగింది. సభ సజావుగా సాగేందుకు సహకరించాలని పార్లమెంటరీ వ్యవహారాల మంత్రి కిరణ్ రిజిజు ప్రతిపక్షాలకు విజ్ఞప్తి చేశారు. లోక్‌సభలో రాహుల్ గాంధీని మాట్లాడనివ్వలేదనే ఆరోపణలు పూర్తిగా తప్పని ఆయన స్పష్టం చేశారు. కేటాయించిన సమయానికి మించి రాహుల్ గాంధీకి అదనంగా ఇరవై నిమిషాలు ఇచ్చినట్టు తెలిపారు. అయితే సభాధ్యక్షుడు ఇచ్చిన ఆదేశాలను రాహుల్ గాంధీ పదేపదే ఉల్లంఘించారని కిరణ్ రిజిజు ఆరోపించారు. అనుమతి లేని అంశాలపై మాట్లాడొద్దని పలుమార్లు హెచ్చరించినా ఆయన వినలేదని అన్నారు. లోక్‌సభ నియమాలు రాజ్యసభ నియమాలకు భిన్నమని, ఒక సభలో జరిగిన విషయాలను మరో సభకు అనుసంధానం చేయరాదని కూడా ఆయన స్పష్టం చేశారు. దీని తరువాత ప్రతిపక్ష నాయకుడు మల్లికార్జున్ ఖర్గే స్పందించారు. అధికార పార్టీపై తీవ్ర విమర్శలు చేశారు. అయితే ఆయన చేసిన ఒక వ్యాఖ్యను సభా రికార్డుల నుంచి తొలగించారు. లోక్‌సభ, రాజ్యసభ కలిసే పార్లమెంటు అని ఖర్గే వ్యాఖ్యానించారు. ఒక సభలో ప్రతిపక్ష నాయకుడికి మాట్లాడే అవకాశం ఇవ్వకపోతే దాని ప్రభావం మరో సభపై తప్పక పడుతుందని అన్నారు. అధికార పార్టీ వ్యవహార శైలి అహంకారపూరితంగా ఉందని ఖర్గే విమర్శించారు. ప్రజాస్వామ్యాన్ని బలహీనపరచే ప్రయత్నం జరుగుతోందని ఆరోపించారు. ప్రతిపక్ష గొంతును అణచివేయాలనే ధోరణి కనిపిస్తోందని అన్నారు. ఈ వ్యాఖ్యలతో రాజ్యసభలో ఉద్రిక్తత మరింత పెరిగింది.