తమిళనాడులో రూ. 10,000 కోట్లతో ఏఐ పార్కు !

చెన్నైలోని తారామణిలో రూ. 10,000 కోట్ల పెట్టుబడితో భారీ ఆర్టిఫిషియల్ ఇంటెలిజెన్స్ పార్కును ఏర్పాటు చేయాలని తమిళనాడు ప్రభుత్వం నిర్ణయించింది. చెన్నై ఐఐటీ రీసెర్చ్ పార్క్ సమీపంలో నిర్మించనున్న ఈ స్వయంప్రతిపత్తి కలిగిన ఏఐ పార్కు, తమిళనాడు సాంకేతిక వృద్ధిని తదుపరి స్థాయికి తీసుకెళ్లే ప్రయత్నంగా భావిస్తున్నారు. ఈ ప్రాజెక్ట్ ద్వారా సుమారు 1,000 మందికి ప్రత్యక్ష ఉపాధి లభిస్తుందని అంచనా. అమెరికా, చైనా వంటి అగ్రదేశాలు ఇప్పటికే ఏఐ రంగంలో భారీ పెట్టుబడులు పెడుతుండగా, తమిళనాడు కూడా సొంతంగా ఏఐ మౌలిక సదుపాయాలను నిర్మించే పనిలో పడింది. ముఖ్యంగా ఏఐ సాంకేతికతను తమిళ నేలకి మరియు తమిళ భాషకు అనుగుణంగా రూపొందించడమే ఈ ప్రాజెక్టు ప్రధాన ఉద్దేశ్యం. దీని కోసం బెంగళూరుకు చెందిన 'సర్వం' అనే సంస్థతో తమిళనాడు ప్రభుత్వం అవగాహన ఒప్పందం కుదుర్చుకుంది. తమిళనాడు ప్రజల డేటా మొత్తం రాష్ట్ర పరిధిలోనే సురక్షితంగా నిల్వ చేయబడుతుంది. దీనివల్ల విదేశీ సర్వర్లపై ఆధారపడటం తగ్గుతుంది. విద్య, వైద్యం, వ్యవసాయం వంటి కీలక రంగాలలో ఏఐ అద్భుతమైన మార్పులు తీసుకురానుంది. రైతులకు పంట సలహాలు, విద్యార్థులకు పాఠ్యాంశాలు, రోగులకు ప్రాథమిక వైద్య చికిత్సలు తమిళ భాషలోనే ఏఐ ద్వారా సులభంగా అందుతాయి. ప్రభుత్వ కార్యాలయాల్లో ఫైల్ మేనేజ్‌మెంట్ వంటి పనులు మరింత సులభతరం అవుతాయి.